बाळराजांचा वरणभात

पहिल्या वाफेचा गरम भात I उकरुनि घ्यावा पानात I 

मोकळा करावा गात I वदनी कवळ घेता II 

भात नसावा कोरडा I नको थंड वा भरडा I 

मऊसूत अन गुरगुट्या I बाळराजांसाठी II 

भातावर तूपाची धार I मीठसुद्धा चिमूटभर I 

लिंबूरसाने चवदार I आमुच्या तोंडास पाणी II 

त्यावर गरम वरण I आणि प्रसन्न वातावरण I 

साऱ्या चिंता होती हरण I सुखद दर्शनाने II 

बाळास खुर्चीत बसवावे I अंगावरती बिब पांघरावे I 

फुंकर मारुनी भरवावे I एकेक घास II 

भात मटमटा पोटात जाई I आईचे घोडे गंगेत न्हाई I 

चटक्यांचे सार्थक होई I  भात कालवताना II 

बाळराजे क्षणही शांत न बसती I खुर्चीवर चढून उभे राहती I 

मधेच ताटावर हात मरती I व्रात्य अन खोडकर ते II 

तोंडातला घास फुरकावणे I मानेला हिसका देणे I 

पोट भरल्याची लक्षणे I बाळराजांची II 

शिलकीचे सेवन आपण करावे I मेतकुटाने सजवावे I 

तोंडी लावण्यास लोणचे घ्यावे I सुख अजून काय ते II